"කදිර දිව්‍යරාජ" දකුණු ඉන්දියානු සිනමාහල් වල දෙමළ බසින් ප්‍රදර්ශනයට සැරසෙයි.

 

පළමු සතියෙම රුපියල් ලක්ෂ 150ක ආදායමක් සමඟ "කදිර දිව්‍යරාජ" නැවතත් සිනමාහල් ප්‍රේක්ෂකයන්ගෙන් පුරවති

2023 වසර ලාංකේය සිනමාවේ ප්‍රීතිමත් වසරක් ලෙසින් එකතු වනවාට සැකයක් නැත. එයට හේතුව සිංහල සිනමාපට සිනමාශාලාවට පැමිණ නැරඹීමෙන් දුරස්ථව සිටි ප්‍රේක්ෂකයන් නැවත වරක් මෙරට සිනමාශාලා වලට ගෙන ඒමට හැකියාවක් ලත් වසරක් ලෙස සැළකිල්ලට ගත හැකි වසරකි. ගජමෑන්, වෙඩි නොවඳින ළමයි, ගාඩි, මිඳුණු විශ්වය, ගුත්තිල වැනි සිනමාපට එයට හොඳම උදාහරණ කිහිපයකි. මෑත කාලිනව අපට සිටින සිනමා අධ්‍යක්ෂකවරුන්ගෙන් එකම වසරක ඔව්න්ගේ සිනමාපට දිත්වයක් ප්‍රදර්ශනය වුයේ ඉතා අල්ප දෙනෙකුගේ පමණි. එයින් උදයකාන්ත වර්ණසුරිය සහ මහාචාර්ය සුනිල් ආරියරත්නයන් ප්‍රමුඛ වෙයි. 2023 මෙම වසරේ දී සුනිල් ආරියරත්නයන් විසින් අධ්‍යක්ෂණය කරන ලද සිනමාපට දෙකක් ප්‍රදර්ශනය වන අතර එය ප්‍රදර්ශනය ඇරඹියේ ළඟ ළඟය. එනම් ක්ෂිර සාගරය කැළඹීණ මැයි මසදී ප්‍රදර්ශනය ඇරඹි අතර ඔහුගේ නවතවම සිනමාපටය ලෙසින් අගෝස්තුවේ දී "කදිර දිව්‍යරාජ" ප්‍රදර්ශනය ආරම්භ විය. විවිධ වූ භාෂාවන් ගෙන් සැදී විදේශීය සිනමාපට මෙරට සිනමාශාලා වල  ප්‍රදර්ශනය සමඟම මෙරට ප්‍රේක්ෂකයන් ඒ වෙත ඇදෙනවා සේම "කදිර දිව්‍යරාජ" නැරඹීම උදෙසා වයස් බේදයකින් තොරව මෙරට සිනමාශාලා වලට ප්‍රේක්ෂකයන් පැමිණෙමින් සමහර සිනමාශාලා House Full වෙමින් පවතිනු දැකිය හැක. 

"කදිර දිව්‍යරාජ" නැරඹීමට මෙතරම් සෙනඟක් ?

ඉතිහාස කතා සහ ජාතක පොත ඇසුරෙන් නිර්මිත බොහෝමයක් සිංහල සිනමාපට හේතුවෙන් මෙරට සිටින යම්  ප්‍රේක්ෂකයන් කොටසක් සිනමාපට ගැන දරන්නේ වෙනස් මතයකි. රජ කතා සහ ජාතක පොතින් ඔබ්බට සිනමාපට තැනිය නොහැකිද යන්න ඇත්තේ විශාල පැනයකි. නමුත් බොහෝ අධ්‍යක්ෂකවරුන් ඒ මතය බිඳ දමමින් මෙරට කර්මාන්තයේ අභිවෘදිය උදෙසා සිනමාපට බිහි කළත් ඔවුන්ට ප්‍රේක්ෂකයන් තෘප්තිමත් කිරීමට නොහැකිව ඇත.  නමුත් "දෙවැනි යුද්ධය" වැනි සිනමාපට මෙම වසරේ දී තිරගත වුවත්, එවැනි සිනමාපට ප්‍රේක්ෂකයන්ගෙන් ගිළිහී ගියේ නිසි ආකාර ප්‍රචාරණයක් නොලැබුණු නිසාය. ප්‍රදර්ශනය වූ බොහෝ සිනමාපට සීමිත දින ගණනකින් ප්‍රදර්ශනයෙන් ගැලවී යාමට එය හේතුවක් විය. සුනිල් ආරියරත්නයන් ගේ "ක්ෂිර සාගරය කැළඹීණ" සිනමාපටයටද සිදුවුයේ එවැන්නකි. නමුත් ඒ හා සමඟම එතුමාගේම නිර්මාණයක් වූ "කදිර දිව්‍යරාජ" වෙනුවෙන් ජාති ආගම් වලින් බැහැරව සිනමාශාලා වල  නැවත වරක් නැඟී සිටිමින් ප්‍රදර්ශනයෙන් පළමු සතියේදී රුපියල් ලක්ෂ 150ක ආදායමක් ලබන්නට සිනමාපටයට හැකිවීම සුවිශේෂී වෙයි.

සුනිල් ආරියරත්නයන් විසින් මින් ප්‍රථම අධ්‍යක්ෂණය කරන ලද පත්තිනි දෙවියන් ගැන කියවෙන සිනමාපටය වූ "පත්තිනි" සිනමාපටයෙන් අනතුරුව දේව පුවතක් ඇසුරුකර ගනිමින් ඔහු විසින් අධ්‍යක්ෂණය කරන ලද දෙවැනි සිනමාපටය "කදිර දිව්‍යරාජ" වෙයි. මෙරට සිටින ජනතාව අනාදිමත් කාලයක සිට පුද පුජා පවත්වන ආගම්, කුල ගොත් වලින් තොරව ලාංකීය ජන හදවත්වල වැඩවසන කතරගම දෙවියන් නොහොත් කදිර දිව්‍යරාජයන් ගේ ජිවිත කතාවේ ජනප්‍රවාදයන් ගෙන් පැවතෙන එම පුවත සිනමා රුපීව හැඩගස්වා ඇසට සිතට සොම්නසක් ගෙනෙන අයුරෙන් "කදිර දිව්‍යරාජ" සිනමාපටය නිර්මාණය කිරීමට ආරියරත්නයන් ඇතුළු කණ්ඩායම සමත්ව තිබෙයි. සිනමාපටය සඳහා ප්‍රේක්ෂකයන් ඇදෙන්නට මේ කතා පුවතම හොඳම සාධකයකි.

දේශීය සිනමාවට විදෙස් රටවලින් නළු නිළියන් යොදා ගනිමින් සිනමාපට නිර්මාණය වුවත් මෑත කාලීනව සිනමාවෙන් වෙන්වී සිටියද,  පුජා උමාශංකර් මෙරට ජනප්‍රියතම දක්ෂ නිළියක් ලෙසින් අදටත් ප්‍රේක්ෂක හදවත් තුල පැළපදියම්ව සිටියි. සුනිල් ආරියරත්නයන් විසින් ඔහුගේ නවතම සිනමාපටය උදෙසා ප්‍රධාන චරිතයන් දිත්වය වෙනුවෙන් නළු නිළියන් තෝරා ගනු ලබන්නේද භාරත දේශයෙනි. කදිර දෙවිඳු ලෙසින් "සමර් වර්මානි"  සමඟ වල්ලී මාතා ලෙසින් "සොනාක්ෂි සිං රාවන්" මෙවර සුනිල් ආරියරත්නයක්න්ගේ තේරීම වෙයි. මෙරට රංගන ශිල්පින් ශිලපිණියන්ගෙන් ඔබ්බට යමින් මෙහි ප්‍රධාන චරිත දිත්වය සඳහා ඉන්දියානු ශිල්පින් දිත්වයක් තෝරා ගැනීමේ හේතු විමසන කළ අධ්‍යක්ෂකවරයාගෙන් අදහස වන්නේ වෙනස්ම එකකි. එය යම් දුරකට සිතුවහොත් සාධාරණත්වයක් තිබෙයි. මෙරට රංගන ශිල්පියෙක් කදිර දෙවිඳු ලෙසත් නිළියක් වල්ලී මාතා ලෙසින් තෝරා ගත හොත් ඔවුන්ට නැවත වරක් මෙරට රුපවාහිනියේ හෝ සිනමාවේ රංගනය යෙදෙන චරිත සමඟ විවිධ මැසිවිලි ප්‍රේක්ෂකාගාරයෙන් හා රසික ප්‍රජාවගෙන් අත්විඳීමට සිදුවේවි යන හේතුන්  නිසාවෙන් මෙසේ තොරා ගැනීමට සිදුවූ බවයි.

පෙර පැවසු පරිද්දෙන් "කදිර දිව්‍යරාජ" නොහොත් කතරගම දෙවිඳු සම්බන්ධව විවිධ වූ ජනප්‍රවාද අප අසා ඇත්තෙමු. සිනමාපටයේ දී තිරය මත දිගහැරෙන කතා සාරාංශය මෙලෙසිනි. 

අනාදිමත් කාලයක සිට දකුණු පළාතේ වනගතව ජිවත් වන වැදි පිරිසක් වටා කතාව ගෙතෙයි. ඔවුන් අතර සිටින සුද්දහාමි සහ උක්කු එතනි දරුවකු පිළිබඳ ආසාවෙන් කතරගම බෝධියට භාරහාර වෙමින් සිටින දෙදෙනෙකි. දිනෙක ඔවුන්ට හමුවන මුවත්තියෙකුගේ මඟ පෙන්වීම හරහා කතරගම වනය තුළදී බිළින්දියක හමුවෙයි. ඈ වනයේ හැදුනු  නිසා බිළින්දියට "වල්ලී" යන නම  තබයි. වල්ලියගේ ජිවිත ගමන (කතර) ආරම්භ වූ ගම හෙයින් කතරගම යන නම පටබැඳී ඇති බව පුරාවෘතවල එයි. දිනෙන් දින වැඩෙමින් වල්ලී රූමත් තරුණියක් වන්නිය. 

තරුණ වල්ලී හට තම සිතේ ඇඳි තේජස් රුවක් හා බැඳී සිටියි. කිසි දිනෙක නොදැකපු ඒ රුවට ඈ එක සිතෙන් ආලය කළාය. ඒ ආදරය කොතරම් එකක්ද කිවහොත් සිතෙන් පමණක් දුටු තම ආදරය කරන පෙම්වතා ගේ පිළිරුවක් නිර්මාණය කර තම යෙහෙළියන් සමඟ ඒ පිළිරුවට පුජා පවත්වන්නට පටන් ගනී. දිනක් එම තැනට පැමිණෙන නාරද නම් ඍෂිවරයා පිළිරුව දැකීමෙන් වල්ලී හට පවසන්නේ ඈ ආදරය කරන්නේ මහා බලසම්පන්න දෙවි කෙනෙක්ට බවයි. ඒ ස්කන්ද නම් භාරතයේ උපන් දෙවිකෙනෙක් බව පවසන විට වල්ලී වඩාත් පුදුමයට පත්වන අතර ස්කන්ද කුමරු ගැන තව තවත් විස්තර අසන්නට පෙළඹෙයි.

අසුරයා නිසා දිව්‍යලෝකයේ සිටින දෙවිවරුන් පිඩා විඳින අතර ඔවුන් අසුරයාගේ අණසකට යටත් කරගෙන සිටින අවදියේ මහා භ්‍රහ්මයා පවසන්නේ අසුරයාගෙන් දිව්‍යලෝකයට සිදුව ඇති විපත්තියෙන් මුදවා ගත හැකි වන්නේ ශිව පාර්වතී දෙදෙනාට දාව උපදින දරුවෙක්ට බවයි. එයින් පසුව කාමදේව සහ ඔහුගේ බිරිඳ වූ රතී එක්ව ශිව සහ පාර්වතී දෙදෙනා අතර ප්‍රේමයක් ඇති කරවයි. ඔවුන්ගේ විවාහයෙන් අනතුරුව ඔවුන්ට උපන් දරුවා වුයේ ස්කන්ද කුමරුයි. වැඩිවියට පත් වූ ස්කන්ද විසින්  අසුරයා වනසනු ලබයි. ඒ ජයග්‍රහණය හේතුවෙන් ඉන්ද්‍ර දෙවියන්ගේ සිය දියණිය වූ දේවයානි දෙව්දුව ස්කන්ද කුමරුන් හට සරණපාවා දෙයි. මේ අයුරෙන් ස්කන්ද ගැන වල්ලිට විස්තර දැනගැන්මට ලැබෙයි. 

දෙවඟනක් බඳු රුපශ්‍රියෙන් සිටින වල්ලී, කඳ සුරිඳුන් වෙනුවෙන් පේ වූ දේව කන්‍යාවක බව නාරද සෘෂිවරයා වටහා ගනු ලබයි. ඒ වන විට ස්කන්ද දෙවියෝ තේවානි අම්මාන් දේව මෑණියන් හා විවාහ වී ඉන්දියාවේ ත්‍රිච්චන්දුර් නම් ප්‍රදේශයේ වාසය කරමින් සතුටෙන් ජීවත්වෙයි. ඒ අතරතුර දී  ස්කන්ද ගේ  ඊළඟ භාර්යාව වන්නට වල්ලි මාතාව සෙල්ල කතරගම (වල්ලී සෙල්ලම් කෙරු ස්ථානය නිසා මෙලෙස සෙල්ල කතරගම යන නම සැදී ඇති බව පුරාවෘත වල සඳහන් වේ) වාසය කරන බව සකන්ද දෙවියන්ට දන්වන්නේ මේ නාරද ඍෂිතුමා විසිනි. එයින් පසුව වල්ලි මාතාව දැකගැනීම වස් ස්කන්ද දෙවියන් නොහොත් කදිර දිව්‍යරාජ ලංකාද්වීපයට වැඩම කරනු ලබයි. ස්කන්ද දෙවියන් සහ වල්ලි මාතාව ගැන ජනප්‍රවාදයන් බොහොමයක් ඇති අතර පර්යේෂණාත්මක සිනමාපටයක් ලෙසින් ජනප්‍රවාදයන් ද එකතු කරගනිමින් අධ්‍යක්ෂකවරයා කදිර දිව්‍යරාජ සිනමාවට රැගෙන එයි. මේ ප්‍රේම කතාවට අමතරව දුටුගැමුණු සහ කඳ සුරිඳු මිත්‍රත්වය මෙන්ම කතරගම දෙවොලේ මූලාරම්භය හා ගණ දෙවියන්ගේ හමුව සිනමාපටය තුළ ප්‍රේක්ෂකයන්ට දැකගැන්මට හැකියාව ලැබෙයි. 

සිනමාපටයේ සෙසු චරිත හරහා නදීපා රණසිංහ, ජගත් චමිල, රොෂාන් පිලපිටිය, නිල්මිණි තෙන්නකෝන්, ධනංජය සිරිවර්ධන, වීනූ සිරිවර්ධන, වසන්ත කුමාරවිල, සම්පත් තෙන්නකෝන්, චරිත් අබේසිංහ, අජිත් ශාන්ත, රංගී රාජපක්‍ෂ, සරත් කොතලාවල, හරිනි කාව්‍යාංජනී, වසන්ත විට්ටච්චි, ජයතිස්ස අතුලසිරි, සමිත හෙට්ටිගේ, සමූදි ජයසිංහ ඇතුළු තවත් ඇති විශාල රංගන ශිල්පින් ශිල්පිණියන් නර්තන ශිල්පින් ශිල්පිණියන් එක්ව තිබෙයි.

ආචාර්‍ය රෝහණ විරසිංහයන්ගේ සප්තස්වර නාද රටාවෙන් ගීතවත් වූ "කදිර දිව්‍යරාජ"  සිනමාපටයේ  හිරුට වඳිමි, දීපවාලී, රෑන ගිරවුනේ, කතරගම තව්තිසාවයි ගීත හතරට අමතරව හරෝ හරා නමින් සමුහ ගීතයක් ද ඇතුළත් වෙයි. සිනමාපටයේ ගීත සඳහා නර්ථන වින්‍යාසය සංඛ අබේසිංහ විසින් සිදුකර තිබෙයි. මෙහි එන හිරුට වඳිමි ගීතය සඳහා කාවඩි නර්ථනය යොදාගෙන තිබීම අතිශය දැකුම්කළුය. එමෙන්ම රවින් කනිෂ්ක සමඟ නිරෝෂා විරාජිනී ගායනා කරන්නාවූ කතරගම තව්තිසාවයි ගීතය මනරම්ය. සිත ශාන්තිමත් කරන්නට තරම් වූ එහි සංගීතය සහ මහාචාර්‍ය සුනිල් ආරියරත්නයන් ගේ පදරචනය මෙන්ම ගායනාවද සිත් ගනී. ඒ හරහා ප්‍රේමනීය භාවාත්මක ස්වරුපයක් සේම කතරගම ගැන වර්ණනාවක් රැගත් මෙය කාව්‍යමය ගීතයකි.

කතරගම 

ඔබ සිටින මේ කතරගම 

තවුතිසාවයි...

සුරතුරුය මේ නුග තුරු...

නමුණු කුල කඳු පන්ති 

හිමාලය කඳු වළල්ලයි...

රණ මයුරය.. රණ මයුරය... 

ඔබේ සැලමුතු පිලෙන් බබළයි...

කතරගම පුජනියයි...

දකුණු දිග

වන්දනියයි.. රුහුණු රට...

කිරිසයුර..

කළඹන විට හමු නොවුණු 

අප්සරාවයි..

අමා බිනු මේ වැසි බින්දු මනු ලොවෙහි පවතිනේ..

දිව්‍යමය වූ ප්‍රේමයයි...

වල්ලී ලෙසින් සොනාක්ෂි ගේ රංගනය ආධුනික බව සහ නර්තනය යෙදෙන අවස්තාවන් හිදී ඈ හට එම අවස්තාවන් ගිලිහෙන බව නිතැතින්ම පෙනියන්නකි. වෙනත් රටක භාෂාව, මුහුණේ ඉංගිතයන්, ඉරියවු, භාව  සමඟ නර්තනය යෙදීම සැබවින්ම ඈ ගත්තා වූ උත්සාහය ගැන වරදක් කීමට සිත්  නොදෙයි. එහෙත් සුනිල් ආරියරත්නයන්ගේ සිනමාපටයක මනරම් ගීත සහ නර්ථනයන් දුටුවේ පත්තිනි හරහා බැව් කිවයුතු වෙයි.එමෙන්ම කදිර දිව්‍යරාජ ලෙසින් හමුවට එන සමර් තුළද ආධුනික බව පෙනෙන්නට ලැබුනත් හඬකැවීම් ශිල්පින් ගේ දක්ෂතාවයන් නිසාම ඒ සියල්ල මඟ හැරී ගියාක් මෙන් දැනෙයි.  නමුත් මෙරට සිටින රංගන ශිල්පින් ශිල්පිනියන් ගේ රංගනයන් ඔවුනට වඩා බොහෝ ඉදිරියෙන් තිබෙන බව කිවයුතුම වෙයි. 

දේවයානි මාතා ලෙසින් රංගනයට පිවිසෙන නදීපා මෙහි කැපී පෙනෙයි. ඇයගේ ප්‍රථම සිනමා ආගමනය වුවත් දක්ෂ අයුරෙන් එම චරිතය තුළ ජිවත් වන බව දැනෙයි. නාරද ඍෂිවරයා ගේ චරිතය තුළ හාස්‍ය රංගනයක්  අවශ්‍යම ද යන්න සිතෙයි. එමෙන්ම දුටුගැමුණු චරිතය චරිත් අබේසිංහ වැනි දක්ෂයෙක් හට ලබා දීම සුදුසු වුවද එම චරිතය තව තවත් බරසාරව පෙන්නුම් කිරීමට ඔහුගෙන් උපරිමය ලබා ගැන්මට අධ්‍යක්ෂකවරයා සමත්වූවා නම් හොඳ යැයි සිතෙයි. එයට හේතුව චරිත් යනු ගැමුණු මහ රජ ටෙලි නිර්මාණය හරහා වඩවඩාත් ප්‍රේක්ෂක ආකර්ෂණය දිනාගත් අධ්‍යක්ෂකවරයෙක් විමයි. එම චරිතය ඔහුට ලැබීම ඉතාම සුදුසු වුවත් පෙරකී හිඩැස නැති වූවානම් තවත් සිනමාපටයයේ කතාවට ශක්තියක් ලැබෙයි. නිල්මිණි තෙන්නකෝන් යනු මෙරට සිටින දක්ෂතා පරිපුර්ණ රංගන වෙධිනියකි. සිනමාපටයේ මවකගේ ආදරය ජනිතකරවන්නට ඈ සමත්ව තිබෙයි. මෙහි ශිව තාණ්ඩව නර්තනය එන අවස්ථාවේ  නර්තනය සහ ශ්ලෝක ගායනය තව තවත් ප්‍රභල සහ ශක්තිමත් එකක් වූවානම් එයද තවත් සිනමාපටයට ජවයක් ගෙනන අංගයක් වූ නමුත් මඟ හැරී ගියාදෝ කියා දැනෙන තැනකි. ඒ තුල ඉන්දියානු නාටකීයව අප දැක ඇති ශිව පාර්වතී නර්තනයට වඩා දෙයක් ප්‍රේක්ෂකයන් ලෙසින් බලාපොරොත්තු වීම සාධාරණය. මෙරට පෞද්ගලික නාලිකාවක විකාශය වූ රාවණා ටෙලිවෘතාන්තයේ ද අනර්ඝ ශිව තාණ්ඩව ශෝස්ත්‍රයක් අසන්නට ලැබූ බවද මතක් කල යුතුවෙයි.

සිනමාපටය පුරාවට පසුතල නිර්මාණයන් මෙන්ම නව පරිගණක තාක්ෂනය (VFX) උපයෝගී කරගනිමින් රූපයන් මවන්නට උත්සහ දරා තිබෙයි. නමුත් ඒවා සාර්ථක අන්දමින් යොදවන්න හැකියාව ලැබුනේ නම් සිනමාපටයට තවත් වටිනාකමක් රැගෙන එන්නට සමත්කම් කියනු නොඅනුමානය. සුනිල් ආරියරත්නයන්ගේ සිනමාපටහි මින් පෙර යශෝධරා සහ පත්තිනි දිත්වයෙහිම මනරම් පසුතල නිර්මාණයන් ඔහු මවා පෙන්විය. නමුත් එවැනි බරසාර පසුතලයන් රැගෙන ආ අධ්‍යක්ෂකවරයා "කදිර දිව්‍යරාජ" හි නව තාක්ෂනය අත්හදා බැලීමට ගත් උත්සාහය නිසා දෝ ඒවා අත හැරී ගියාක් මෙන් දැනෙයි. එමෙන්ම සිනමාපටය ඉන්දීය මෙගා නාට්‍යානු රූපී බවක් යම් යම් තැන් වලදී ඉස්මතු වෙයි. 

අතීත පුරාවෘතයක් ලෙසින් පැමිණෙන "කදිර දිව්‍යරාජ" හි ඇඳුම් සහ ආභරණ නිර්මාණය සම්මානනීය ඇඳුම් නිර්මාණ ශිල්පී වෙනුක වික්‍රමනායක විසින් සිදුකර තිබෙයි. ඔහු සිනමාපටයට උචිත අයුරෙන් ඇඳුම් නිර්මාණය කර තිබීම සහ වර්ණ භාවිතය හරහා චරිතයන් ට ආලෝකයක් හැඩයක් පෞර්ශවයක් ලබා දෙයි. අංග රචනය සිදුකලා වූ ප්‍රියන්ත දිසානායක චරිත පිලිබඳ හොද අධ්‍යනයක් කරමින් ඔහුගේ කාර්යය සිදුකර තිබෙන බව පෙනෙයි. එමෙන්ම කේෂා අලංකරණය සඳහා ද හරූන් ෂයිඩීන් ගෙන් එම චරිතයන් වලට අදාළ චරිත ඉස්මතු වීමට රුකුලක් වී තිබෙයි.  

චන්න දේශප්‍රිය යනු මෙරට සිටින දක්ෂ කැමරා අධ්‍යක්ෂකවරයෙකි. ඔහුගෙන් සිනමාපටයට ලබා දෙන සත්කාරය නිතැතින්ම සුමටය. දෑස් වලට අපහසු රූපරාමු වලින් ඔබ්බට යමින් සෞම්‍ය ලෙසින් ඉදිරිපත් වීම මෙන්ම වර්ණ සංයෝජනය කල ආනන්ද බණ්ඩාර ද සිනමාපටයේ රුප රාමු වලට අගයක් එක් කර තිබෙයි. 

"කදිර දිව්‍යරාජ" යනු මහාචාර්ය සුනිල් ආරියරත්නයන්ගේ සිනමාපට පෙළෙහි හොඳම සිනමාපටය නොවන්නට හැක. නමුත් එය සිනමාශාලාවේ බලා සිටීමට අපොහොසත් නීරස සිනමාපටයක් ද නොවෙයි. සයිබර් අවකාශය පුරා විවිධ වූ විචාරයන්, ගල්, මල් ,  අතර "කදිර දිව්‍යරාජ" සිනමාපටය තවමත් හොඳ ප්‍රේක්ෂක ප්‍රතිචාරයන් සමඟ තිරගත වෙයි. එයින් තවමත් මෙරට සිනමාව වෙනුවෙන් ප්‍රේක්ෂකයන් සිටින බව දැකගනිමම සතුටකි. එමෙන්ම දකුණු ඉන්දීය සිනමාශාලා වලදී ද "කදිර දිව්‍යරාජ"  සිනමාපටය ඔවුන්ගේ බසින් හඬ කවා ප්‍රදර්ශනය කිරීමට ඉල්ලීම් කර ඇති බවද එය එසේ වුවහොත් මෙරට ඉදිරියට පැමිණෙන නිර්මාණයන්ටත් විශාල තෝතැන්නක් වේවි. සැබවින්ම එය සුභදායක සතුටු දනවන පුවතකි.

සිනමාපටය මේ වන විට ලක්ෂ 150ක ආදායමක් ලබා ඇති අතර ඉදිරියේදී මෙය තව තවත් වර්ධනය නොඅනු මානය. ක්ෂිර සාගරය කළඹමින් පැමිණි "කදිර දිව්‍යරාජ"  තව තවත් ඉහළ ප්‍රේක්ෂක ප්‍රතිචාර මැද දින 100 දක්වාම ප්‍රදර්ශනය වීමට හැකියාව ලැබේවා යන්න පැතුම් එක් කරමින් දේව කතා, රජ කතා, ජාතක කතා වලින් ඔබ්බට යමින් මෙරට අනන්‍යතාවයක් ඇති සිනමාවක් ගොඩ නංවාලීමට සිත් පහල වේවා!!!

සටහන ගිහාන් තිලකරත්න 

Art Street කලා වීදිය වෙනුවෙන්.